हायजैक

 हायजैक

--- कुंदन अमिताभ ---

गाँव सॆं शहर ऐथैं
चौंधियाय जाय छियै
हायजैकर हाथॆं हायजैक 
होय जाय छिऐ- हम्मॆं

हमरॊ आपनॊ भाषा अंगिका कॆ
छिनी लै छै हमरा सॆं
आरू हमरॊ जुबान बंद करी दै छै
मुँहॊ कॆ साटी दै छै

कहै छै जॊंय जिंदा रहना छौं
तॆ अंगिका मॆं बोलना
बंद करै लॆ परथौं
हर हालत मॆं

हम्मॆं हथियार निकालै छियै
आपनॊ आत्मरक्षा वास्तॆं
हिन्दी मॆं बतियाबॆ लागै छियै
धाराप्रवाह हिन्दी मॆं

हायजैकरॆं घूरी - घूरी देखै छै
प्रश्न करै छै कि की
हिन्दी बतियैला सॆं बची जैबै
खिसियाय कॆ हमरा पटकै छै

होश आबै छै तॆ पाबै छियै
अपना कॆ अंग्रेजी सॆं पूरा लैस
हमरॊ अंगिका हमरॊ हिन्दी
कहीं हेराय गेलॊ रहै

हम्मॆं अंग्रेजी के ड्रग पीबी-पीबी
मतियैलॊ रहॆ लागलियै
हमरॊ दुनियां बदली गेलॊ रहै
बदन पर चकाचौंध केरॊ स्टीकर चिपकी गेलै

हायजैकरॆं हमरा आजाद करी देलकै
अंग्रेजी के गुलाम बनाय कॆ
अंग्रेजी के ड्रग पिलाय - पिलाय कॆ
हमरॊ संस्कृति कॆ डुबाय कॆ

इ तॆ संयोग ऐन्हॊ बनलै कि
ड्रग बार मॆं एगॊ मिली गेलै
कहलकै - " की भाय की हालचाल छै ? " 
अंगिका सुनी कॆ होश ऐलै

ओॆहीं लॆ लानलकै फिरू सॆं गाँव
लोगें कहै छै हम्मॆं कत्ते स्मार्ट
बनी गेलॊ छियै - भगवान करॆ
ऐन्हॊ हायजैक तॆं सबके हुऎ

ओकरा की पता हमरॊ अंदर के हालत
सब लुटी गेलॊ रहै - भाषा, संस्कृति सब
लुटेरा सथें रही कॆ लुटेरा बनी गेलॊ रहौं
अंग्रेजी के चमक सॆं सबकॆ लूटॆ सकै छेलौं

हमरा अबॆ बार - बार यहॆ डॊर 
लगी रहलॊ छेलै कि लुटेरा प्रवृत्ति
के साथ कहीं अंगिका आरू हिंदी केरॊ 
हायजैकर नै बनी जाँव

Angika Poetry : Hijack
Poetry from Angika Poetry Book : Sarang
Poet : Kundan Amitabh
Please visit  angika.com  for more Angika language Poetry